praktikatu

Abantailak eta deskontuak

2011-12-12T13:00:00.002+01:00

Mintzapraktika programetan parte hartzen dugunok, euskaraz hitz eginez gozatzeaz gain, berbalagun, mintzalagun, mintzakide... izateagatik bakarrik, hurrengo abantaila hauek izango dituzu:

AIZU! aldizkariaren urte osoko harpidetza (10 zenbaki) merkeago izango duzu.
BERRIA egunkariak %50eko deskontua eskaintzen dizu asteburuetako harpidetzan.
ARGIA astekaria, hilabetez (4 zenbaki) doan jasotzeko aukera izango duzu eta harpidtza egin nahi izatekotan; urte osokoan %25eko deskontua izango duzu eta bestela hilean behineko harpidetza egin ahal izango duzu 39 euroan.
Udako Euskal Unibertsitatea UEUko ikastaroetan %25eko deskontua.
Euskal Herriko Unibertsitatea EHU-UPVko ikasle bazara, aukera askeko kredituak lortu ahal izango dituzu mintzapraktika progamaren batean parte hartzeagatik.

Abantaila hauek guztiak aprobetxatu nahi baldin badituzu eta zure herriko mintzapraktika progaman parte hartu nahi baduzu, bete fitxa hau eta zurekin harremanetan jarriko gara.

Euskara atsegin dut!

2011-09-23T10:59:00.000+02:00

AEK-k, euskaltegietako matrikulazio kanpainarekin batera, mintzapraktika programetarako kanpaina berria jarri du abian Atsegin dut! lemapean. Horrenbestez, 11-12 ikasturtean mintzapraktika programa batean parte hartu nahi duten guztiek eman dezakete izena jada Euskal Herrian diren 90tik gorako egitasmoren batean. Mintzapraktika programetan edozeinek har dezake parte, berdin dio euskaldun zaharra, euskaltegiko ikasle ohia edo euskaltegiko ikaslea izan. Kanpaina honetan azpimarratu nahi dena zera da; euskara harreman sareak sortzeko tresna ere badela. "Atsegin dut!" esamoldea interneteko sare sozialekin lotzen dugu nahitaez. Baina sare sozial birtual hauetaz gain, euskara praktikatzea aurrez aurreko harreman sareak sortzeko era egoki bat izan daiteke. Benetako sare sozialak, alegia. Atsegin duzu?

Azken aldian denon ahotan dabiltza interneteko sare sozialak. Harreman sare birtual horien balioa eta beharra ez dugu guk zalantzan jarriko, guk ere erabiltzen ditugu, baina egitako sare sozialak, aurrez aurreko harreman sareak, atsegin badituzu eta gainera euskara praktikatuz eraiki nahi badituzu, ez duzu inon ezer klikatu behar; eman izena Euskal Herrian diren 90tik gorako egitasmoren batean.

Mintzapraktika programa euskaraz hitz egiteko ohitura duten pertsonak euskaraz hitz egiteko ohiturarik ez dutenekin elkartzean datza. Hori dela eta, Euskal Herriko lurralde guztietako hiri, herri eta auzoetan hainbat dira martxan dauden mintzapraktika programak. Egitasmoetako partaideek EHUko kredituak eskuratu ahal dituzte, bidaia eta egonaldietarako deskontuak, AIZU! eta berria merkeago, eta beste hainbat abantaila.

UPV-EHUko kredituak eskatzeko.

2011-09-20T12:14:00.000+02:00

Jakingo duzuenez azken urteotan dugun hitzarmenari esker AEKren mintzapraktika egitasmoetan (berbalagun, mintzalagun...) parte hartzen duten Euskal Herriko Unibertsitateko ikasleek aukera askeko kredituak eskura ditzakete.

2010-11 ikasturtean horrelako egitasmoren baten parte hartu duten ikasleek euren herriko dinamizatzaileari ziurtagiria eskatu ahal diote. Era berean, gogoratu aurten ere izena eman dezakezula gure programetan.

Izena eman edo informazio gehiago nahi izanez gero, bete fitxa hau eta zurekin jarriko gara harremanetan.

Südtirol-etik dator notizia

2011-09-16T12:19:00.002+02:00

Bozen (Bolzano) Italiako herrialde autonomoan alemaniaren erabilera sustatzeko Voluntariat per les llengües programa abian jarri dute. Italiar hiztunen artean alemanera sustatzea da egitasmoaren xedea; izan ere, alemanera hizkuntz ofiziala da herrialde osoan, eta horretarako Katalunian aski ezaguna den Voluntariat per la Llengua egitasmoa erreferentzi moduan hartu dute.

Programan alemaneraz egiten duen jendea ikasi nahi duen italiar hiztunekin elkartzen da, gure mintzapraktika egitasmoetan bezala! Honezkero 600 lagun daude izena emanda; gehienak Bozen hiriburukoak dira baina beste hiri eta herrietara ere zabaltzen ari da: Meran, Brixen, Bruneck...

Euskal Herrian mintzapraktika egitasmoetan gabiltzanok zorterik handiena opa nahi diegu. Viel Glueck!

AEKrekin euskararen bide naturalak ezagutu!

2011-06-07T13:08:00.001+02:00

Urtero bezala, AEK-k bere udako eskaintza prestatu du; ikastaroak, barnetegi arruntak, familia barnetegiak, Baina naturarekin harreman estua izan nahi baduzu, aukera bereziak badituzu.

Urepeleko barnetegian, euskara eskolez gain, inguruko mendietara txangoak egiteko aukera eskaintzen duena.

Barnetegi Ibiltarietan, bizikletaz eta oinez, ez dago eskola ordurik mintzapraktikara bideratuta daudelako, baina arduradunak irakasleak direnez edozein zalantza argitzeko prest dauzkazu. info+

Animatu eta ezagutu euskararen bide naturalenak!

Udako Euskal Unibertsitatean deskontuak!

2011-05-23T11:52:00.001+02:00

Aurton ere, mintzapraktika egitasmoetan parte hartzen duten lagunek %25ko deskontua izango dute UEUk antolatzen dituen ikastaroetan. Informazioa hemen.
Horretarako baldintza hauek bete beharko dira:

Praktika egitasmoetan parte hartzea; berbalaguna, mintzalaguna, mintzakidea...

Bestelako diru-laguntzarik ez jasotzea (udalarena, foru aldundiarena...)

Izena eman aurretik eskaera orria bete behar duzu, edo bestela zure herriko dinamizatzaileari komentatu. Datuak baieztatu ostean, ikasleak matrikula egingo du.

Aukera ezin hobea da gauza berriak ikasi eta bide batez zure euskara hobetzeko.

Mintzaeguna 2011

2011-05-11T13:29:00.000+02:00

Mintzapraktika egitasmo berriak martxan; Trapagaran, Andoain eta Asparrena

2011-05-02T14:36:00.001+02:00

Trapagarango aurkezpenaren argazki bat

Trapagaranen (Bizkaia) euskara praktikatzen arituko diren Berbalagun taldeak biltzen hasiko dira dagoeneko izena eman duten lagunekin. Bizkaiko Meatzaldean hiru ziren orain arte berbalagun egitasmoa martxan zuten herriak: Muskiz, Abanto-Zierbena eta Ortuella. Orain Trapagaranekin eskualde osoan martxan dago egitasmoa. Une honetan ehunetik gora izan dira praktika jardueretan parte hartu zuten lagunak, eta antolatzaileek aurreko urteetako arrakastari eustea dute helburu ikasturte honetan.

Andoainen (Gipuzkoa) ere mintzalagun programa gogotsu hasi da. Andoaingo AEK eta Udalaren arteko hitzarmena bada ere, herriko beste eragile askok parte hartzen dute programa honetan (euskara elkarteak, irakaskuntza zentroak eta kirol taldeak).

Bi horiez gain, Asparrenan (Araba) berbalagun egitasmoa maiatzaren lehen hamabostaldian abiatuko da. Horretarako aurkezpen bilerara deitu dute maiatzaren 13an, arratsaldeko 19:30ean, Araiako udaletxean. Bertan, egitasmoaren gaineko xehetasunak jasotzeaz gain, berbataldeen osaketa eta taldekideak ezagutu ahal izango dira. Iaz Agurainen abiatu zen egitasmoa Arabako Lautadan zabaltzen ari da eta irailetik aurrera Dulantzin ere martxan jartzeko asmoa dute bertako eragileek.

Kopla idatzi sariketa

2011-03-11T18:20:00.004+01:00

Parte hartzaileak: AEKko euskaltegietako ikasleak zein praktika egitasmoetako lagunak.

Egin beharreko lana: 6 koplaz osatutako bertsoaldi bat idatzi. Doinua: ama begira zazu, ikusi nuenean

Gaia: Euskalakari baten eguna

Saria: Afari edo bazkari bat sagardotegi batean, bi bertsolarirekin irabazten duen talde osoarentzat.

Azken eguna: Apirilak 1.

Nora bidali: Helbide honetara

Epaile lanak: Bertsozale Elkartea.

Oharra: Bertsoaldia idaztea eta bidaltzearekin aski da baina bertsolaritzan doinua ere ezinbesteko osagaia denez, baina koplak abestera animatu nahi zaituztegu; beraz, grabatu eta bidali. Bideoz iristen diren bertsoaldiek puntu gehigarri bat izanen dute.

Hitzaditzaren 6. edizioa

2011-03-09T17:32:00.003+01:00

Euskal Kultur Erakundeak eta AEK-k Hitzaditza diktaketaren 6. edizioa antolatu dute 2011ko apirilaren 2an, Baionan.

Iaz bezala, aurtengo Hitzaditza gazteengana bideratu da. Testuen sortzea galdetua izan zaie Baionako Etxepare lizeoko ikasleei

Izen ematea hemen.

Sopelako esaera zaharren txapelketaren 18. edizioa

2011-03-08T14:06:00.002+01:00

2011ko txapelketa apirilaren 2an (larunbata) burutuko da, eta Bizkaiko txapelduna den Arkaitz Estiballes bertsolariak hartuko du parte, Alaia Martinekin batera. Eurek botako dituzte bertsoak arratsalde partean taldeek horien baitan ezkutatzen diren esaera zaharrak zein diren asma dezaten.

Ohi bezala, herrian zehar jokatuko dira txapelketako lehen kanporaketak goizeko 11etatik aurrera, musikak eta bertsoek lagunduta. Finalerdia eta finala, berriz, Ander Deuna Ikastolan ospatuko dira.

Izena ematea martxoaren 28ra arte egongo da zabalik Esaerak eta horien azalpenak eta txapelketaren oinarriak

Ama-hizkuntzaren eguna

2011-02-21T12:52:00.005+01:00

UNESCOren arabera, gaur, otsailak 21, ama-hizkuntzaren eguna da. Euskararen transmisioa bermatu(ko) duten gurasoentzat besarkadarik beroena; eta batez ere, euskaltegietan ikasi duzuenontzat.

Argazkian, familia barnetegiko gurasoak eta umeak.

Udan Irlandara goaz! 8 egun euskaraz

2011-02-10T11:37:00.002+01:00

Irlandanet elkartearekin dugun akordioaren barruan mintzapraktika egitasmoetan parte hartzen duzuen lagun guztiok %10eko deskontua izango duzue antolatutako bidaietan.

Prezioa deskonturik gabe 395 euro inguru!!! (gida euskalduna+furgoneta+aterpeak)

Aurton AEKkideoi ere; irakasleei eta ikasleei, deskontua aplikatuko zaie.

Datak:

Uztailaren 5etik 12ra
Abuztuaren 2tik 9ra
Irailaren 6tik 13ra

Talde txikiak direnez izena eman nahi baduzu ahalik eta arinen egitea komeni da. Informazioa eta izen ematea

Mintzapraktika egitasmoak, masa-fenomeno berria?

2011-02-03T19:16:00.001+01:00

Bilboko eta getxoko berbalagunak sagardotegirako txangoan.

Eusko Jaurlaritzak, Topaguneak, AEK-k eta Aztikerrek Mintzapraktika egitasmoaren eraginkortasuna neurtzeko egindako ikerketaren emaitzak aurkeztu dituzte gaur goizean Euskaltzaindiaren egoitza nagusian egindako prentsa agerraldian. Oro har, egitasmoaren balorazio positiboa egin dute eta mintzalagun kopuruak izan duen gorakada nabarmendu dute.

Mintzapraktika egitasmoaren eraginkortasuna neurtzeko 2004-05 eta 2008-09 ikasturteetako datuak kontutan hartu dira, egitasmoen osotasunean aztertzea eta horretarako ildo eta teknika ezberdinak baliatuz. Ikerketak utzi dituen emaitzekin “pozik” agertu dira eragileak, oro har, egitasmoaren balorazio positiboa egin dute. Mintzalagun kopuruak izan duen gorakada azpimarratu dute, batez ere: “Mintzapraktika egitasmoetan parte hartzaile kopurua izugarri hazi da; 2004-05 ikasturtean 1.041 lagun izatetik, 2010-11an 3.847 izatera pasa da. Horrelako hazkundea izaten duten ekimenak oso gutxi dira, masa-fenomeno baten aurrean gaudela esan daiteke ” ikerketako arduradunen arabera

Mintzapraktika egitasmoan ari diren lagunek programaren balorazio “positiboa edo oso positiboa” egiten dutela azaldu dute, eta horrek arduradunen asebetetze maila betetzen du. “Egitasmoa bideratzeko egiten duten ahalegina modu positiboan baliosten duela erakusten du eta horrek izugarri poztu gaitu. Batezbestekoa 8,5a gainditzen du, bide onean goazela berretsiz”.

Txostenaren laburpena irakurtzeko klikatu hemen

Korrika 17ko kanta.

2011-01-20T17:39:00.001+01:00

zorionak eta urte berri on, euskalakari!

2010-12-21T14:15:00.000+01:00

geu ere euskalakariak gara!

2010-12-16T19:18:00.000+01:00

Euskal Herrian bizi dena euskal herritarra bada eta euskalduna euskaraz dakiena, nola deitu behar diogu euskara maitatu, ikasi eta erabili egiten duenari? Nola, euskaraz bizi denari? AEK-k eta Korrikak horiei guztiei izena ipini nahi diete Korrika 17rekin: euskara maite duena, ikasten eta erabiltzen duena, euskalakaria¹ da:

¹: 1. iz. / izond. Euskara maitatu, ikasi eta erabiltzen duena. 2. iz. / izond. Euskara erabiltzeko helburuz, euskara maitatuz, euskara ikasi, eta hobetzeko ahaleginak egiten dituena. Horretarako urratsak ematen dituena.

Aiaraldeko berbalagunen spot-a

2010-12-09T13:06:00.002+01:00

Euskal Herriko beste txoko askotan bezala, Aiaraldean ere euskarazko mintzapraktikak egiten ibiltzen dira Aiaraldeko berbalagun taldeak. Aiaraldea.com-ek haiekin elkarlanean spot hau prestatu du.

praktikatu eta berbalagunak 11 telebistan

2010-11-26T12:22:00.000+01:00

Asteon, Hamaika Telebistako Hona hemen saioan AEKren praktika egitasmoen berri eman dute, bideo honetan Barakaldoko berbalagunen testigantzak ikus ditzakezu.

irakurle kanpaina, 2010eko negua

2010-11-25T14:37:00.001+01:00

Irakurle kanpaina AEKn ikasturtean bitan, egiten dugun eskaintza da. Irakurle kanpainaren bidez euskal liburu eta diskak merkeago eskuratzeko aukera eskaintzen die AEK-k bere ikasle, irakasle eta AEKide guztiei.

Irakurle kanpainaren helburua, AEKideei liburuak eta diskak eskuratzeko baldintza hobeak eskaintzeaz gain, euskara ikasleen artean euskal literatura eta musikaren kontsumoa sustatzea da.

Hemen daukazu 2010eko neguko katalogoa

Gasteizen euskaraz; egingo al dugu?

2010-11-18T18:18:00.000+01:00

Azaroaren 17an hasi eta ikasturtean zehar iraungo duen kultur programa da Egingo al dugu? egitasmoa. Iaz sortu eta aurten hazi egin den ziklo honetan era askotako estilo, formatu eta edukiak uztartu nahi izan ditu Gasteizko AEKk, hiriko leku ezberdinetan. Musika, antzerkia, hitzaldiak, diaporamak, tailer ezberdinak gozagai auzo elkarteetan, gaztetxean, gizarte etxeetan, tabernetan...

Kultura eta ezagutza zabaltzeko, euskara baliagarri sentiarazi nahi diete AEK-ko ikasleei, Gasteizko euskal hiztunei eta jendarte osoari eta atzoko aurkezpenean, ekimen horietan parte hartzeko deialdia zabaldu zuten.

Zer da hizkuntza ongi hitz egitea?

2010-11-05T12:13:00.004+01:00

Galdera hori egin diegu Antiguako AEK euskaltegiko ikasle eta irakasle batzuei.

udako barnetegi ibiltariak hamaika telebistan

2010-10-07T13:19:00.001+02:00

Hamaika telebistako erreportaia ikusi duzu?

atera arbela kalera! kanpaina berria

2010-09-28T18:49:00.000+02:00

Tunisia ezagutzeko gogorik bai?

2010-09-24T13:25:00.004+02:00

Aizu!-ko harpideduna izanez gero, Tunisiara musutruk joan zaitezke. Eroski Bidaiak-i esker zortzi eguneko bidaia zozkeatuko dugu harpidedun guztien artean urriaren 22an, eta irabazlearen izena azaroko zenbakian ezagutaraziko dugu.

Egin zaitez harpidedun epe hori baino lehen, eta zozketa honetan hartuko duzu parte. Zorte on!

bai, nahi dut

2010-09-15T10:43:00.008+02:00

Bai, nahi dut!. Oso testuinguru zehatz batekin lotzen dugu esaldi hori askotan, eta testuinguru horrek konpromisoa dakargu gogora, askatasunez hartutako konpromisoa, benetan nahi izatearen ondorioa. Izan ere, hor dago gakoa, eta oinarria: nahi izatea da kontua.

Bai, nahi dut!. Erabaki irmo baten aldeko jarrera azaltzen du esaldi ezagun honek, borondatezkoa eta derrigortasunik gabekoa den lotura. Norberak aukeratzen du noiz lotu, eta noiz arte, non eta nola, baina izan argi, behin euskara ikasita, ondare hori betiko izango duela Bai, nahi dut!esaten duenak, euskarak ez baitio sekula huts egingo. Lehen urratsa, kasu honetan, Bai, nahi dut! konbentzimenduz eta benetan esatea baita.

barnetegi ibiltaria

2010-07-22T12:19:00.002+02:00

Berria TB-k bideo polit hau egin digu, eskerrik asko!

berbaditza eta Bilboko ikasleen jaia

2010-06-08T14:23:00.003+02:00

Iparraldean Euskal Kultur Erakundeak eta AEK-k antolatzen duten Hitzaditza lehiaketa eredutzat hartuta, izena bizkaierara egokitu eta Berbaditza Diktaketa Txapelketa antolatu du Bilboko AEK-k ekainaren 17rako, ikasturtea bukatzeko egingo den Ikasleen Jaiaren barnean.

Bilborock-en burutuko den txapelketa honen helburuetako bat da euskararen praktika euskaltegietatik ateratzea eta Bilboko euskaltegi ezberdinetan dabiltzan ikasleek elkar ezagutzea. Bestalde, euskal fonetika eta ortografia lantzeko aukera paregabea izango dute AEK-ko ikasleek. Lehiaketa hiru mailatan banatuko da eta Lutxo Egiak, Uxue Alberdik eta Kirmen Uribek prestatutako testuak irakurriko dira.

10:30ean hasiko da diktaketa saioa, eta ondoren bertara hurbildutako ikasleek Mikel Martinez eta Patxo Telleriaren antzezlan bat ikusi ahal izango dute. Sari banaketa iluntzean izango da, 18:30etatik aurrera Bilborock-en bertan ospatuko den jaiaren barnean: jolasak, sariak, musika... Ez da animaziorik faltako ikasturte bukaerako festa horretan!

“mihi puntan duzuna” ateratzeko udako eskaintza

2010-06-08T11:45:00.004+02:00

mintzapraktika, UEUko ikastaroak eta deskontuak

2010-05-26T14:19:00.009+02:00

Aurton ere, mintzapraktika egitasmoetan parte hartzen duten lagunek %25ko deskontua izango dute UEUk antolatzen dituen udako ikastaroetan. Horretarako baldintza hauek bete beharko dira:

Egitasmo batean parte hartzea.
Bestelako diru-laguntzarik ez jasotzea (bere udalarena, foru aldundiarena...)

Izena eman aurretik eskaera egin behar da, baieztatu ostean, ikasleak matrikula egingo du.

Dudarik gabe, udan euskara lantzeko beste aukera paregabea.

udako barnetegi ibiltariak

2010-05-20T18:55:00.003+02:00

Udako eskaintzaren barruan, aurton ere, praktikatzeko barnetegiak antolatu ditu AEK-k. Bi dira aurtengo eskaintzak:

Barnetegi ibiltaria (oinez) Lehen aldiz, uztailaren 3tik 18ra Euskal Herria mendirik mendi zeharkatuko dugu mutur batetik bestera.

Barnetegi ibiltaria (bizikletaz) Aurtengoa 10. edizia izango da eta ziurrenik, uztailaren 17tik 31ra Euskal Herriko hainbat txokotan ibiltariko txirrindulariak topatuko dituzue.

Barnetegi hauen prezioa: 450 euro dena barne
Izena ematea: ibiltaria@aek.org edo telefono hauetara:

barnetegia oinez: 663 030 568 (azken eguna: ekainaren 24a)
barnetegia bizikletaz: 630148 159 (azken eguna: uztailaren 8a)

Basauriko hitz gurutzatuen txapelketa

2010-05-12T13:57:00.003+02:00

Datorren maiatzaren 29an, larunbatez, Basauriko hitz gurutzatuen I. txapelketa egingo dute. Txapelketa bada ere, euskaldunon eta euskara ikasleon arteko topaketa dela esan daiteke, giro alaian eta patxadan elkar ezagutzeko aukera izango baitute egun horretan.

Izena ematea eta informazioa: Basauriko Bolintxu AEK Euskaltegian edo 944.408.264 telefonoan.

AEKkarparen 10. edizioa

2010-04-30T16:41:00.005+02:00

Iruñeko Donibane auzoan kokatuta dago Irrintzi AEK euskaltegia, urtero jaialdia prestatzen dute bertako auzoko euskaldunekin karpa handi baten babesean. Aurten X. AEKkarpa eginen dute, hori dela eta, egitarau zabala prestatu dute. Goizean futbito, dantzari txikien topaketa, AEKolinpiadak, ardo feria, kantuz, mus txapelketa, bazkaria, kalejira eta bueltan dantzaldia eta kontzertua. Ederra ezta?

Egun horretan bertan, Iruñean ere, Kontseiluak manifestazioa deitu du Nafarroan euskaraz bizitzeko eskubidea lelopean. Aukera paregabea duzu biak uztartu eta egun osoko plana egiteko.

Info+: 948 27 41 60 edo mezua bidali

Nafarroan euskaraz bizitzeko eskubidea

2010-04-26T17:34:00.003+02:00

Nafarroako euskalgintzak, tartean AEK-k, maiatzaren 15ean I ruñean egingo den manifestaziora deitu du. Euskarak Nafarroan bizi duen egoerarekin kezkatuta eta Nafarroako Gobernuak euskararekiko duen kontrako jarrera salatzeko manifestazioa antolatu dute Euskararen Gizarte Erakundeen Kontseiluak, euskalgintzako kideek eta norbanako euskaltzaleek. Nafarroan euskalgintzan diharduten talde eta norbanako ugarik agertu diote babesa manifestazioari.

AEK-k ideologia guztietako nafar guzti-guztiei manifestazioan parte hartzera dei egiten die. Deialdiarekin bat egiteko klikatu hemen

Hitzaditza, euskarazko diktaketaren 5. edizioa

2010-04-23T19:15:00.004+02:00

Euskal kultur erakundeak eta AEK-k Hitzaditza diktaketaren bosgarren edizioa Baionan antolatu dute 2010eko maiatzaren 29an.

Diktatu idatziaren ariketa aitzakitzat hartuz, Hitzaditzaren helburua da euskararen erabilera sustatzea eta bereziki irakurmena eta idazmena bultzatzea, batetik diktaketa bera eginez, bestetik euskal idazle zenbait ezagutuz eta gurutzatuz.

Lau sailetan banatuko dira parte hartzaileak: euskaldun trebeak, euskara ikasten ari direnak, 13-14 urte arteko gazteak, 15-16 urteko gazteak. Zuzenketak, egun hartan berean eginen dira eta irabazleen izenak jakinaraziko ditugu eguerdi aldera. Sariak orduan banatuak izanen dira, beti ere kulturari lotuak (hiztegiak, DVDak, KDak, liburuak, sarrera txartelak…).

info+ hemen

XIX.txiste eta pasadizo idatzien lehiaketa jokoan da jada

2010-04-19T16:40:00.002+02:00

Txiste edota pasadizo bitxiren bat buruan baduzu pasa ezazu lehenbailehen paperera eta bidali AEK-ra. Izan ere, Goierriko Goiztiri AEK Euskaltegiak Ordiziako Udaleko EBPNren babesean antolatuta XIX. Txiste eta Pasadizo Idatzien lehiaketa jokoan da jada.

16 urtetik gora badituzu parte har dezakezu soilik eta txiste nahiz pasadizoak euskalkiaz edota euskara batuan idatziak izango dira; nahi adina bidal ditzakezu. 3 txiste onenek bina afariko saria izango dute zain, Itsasoko Osatu Jatetxean, Ormaiztegiko Kuko Jatetxean eta Zeraingo Mandioa Jatetxean.Txisteak jasotzeko azken eguna maiatzaren 21a izango da, bidaltzeko klikatu hemen Anima zaitez!

Uda honetan Irlandara euskaraz

2010-04-14T18:30:00.000+02:00

Aste santuko oporrak bukatu berri dira eta burua udakoetan badaukazu laster AEKren udako eskaintzaren berri jasoko duzu. Bitartean zure oporraldia prestatzen has zaitezen eskaintza polita jaso dugu Irlandanet elkartetik.

395€tik hasita gida, garraioa eta aterpetxea sartuko lirateke (hegaldiak ez dira sartzen baina elkartetik laguntzen ahal dute hori lotzen) Talde txikiak dira eta Irlandako historia, kultura, hizkuntza, musika, parranda, hondartza, mendia... lirateke osagai nagusiak eta dena euskaraz.

Informazioa eta izana emateko klikatu hemen, adi egon kopurua mugatua delako!

AEK etorkizunari begira bere XIII. mintegian

2010-03-29T15:08:00.002+02:00

AEK-k jai giroan ospatu du XIII. Mintegi hau, pasa den abenduan bete baitziren 30 urte Arantzazun bere lehenengo mintegia egin zuenetik. Ordutik hona, beste hamabi mintegi prestatu ditu, koordinakunde izatetik Euskal Herri osoan aritzen den erakunde izatera pasatu da, milaka eta milaka lagun euskaldundu ditu eta hamasei Korrika antolatu. Hori irudikatu dute amaiera ekitaldian taula gainera igotako bost irakaslek, aurrena “AEK, hiru hamarkada garena ikasten” esaldia osatzen zuten bost koadro erakutsiz, eta ondoren, haiei buelta emanda, “Etorkizunean ere Euskal Herria euskalduntzen” esaldia osatuz. Izan ere, AEK-k iragana du, baina baita etorkizuna ere.

Iragan eta etorkizun horren isla izan da amaiera ekitaldiaren hasieran entzun den AEKren historiari buruzko kontakizuna, argazki zahar eta berriz hornitua. Eta ildo horretatik jarraitu dute ondoren parte hartu duten hizlariek ere. Kortatu taldearen AEK-ko beteranoak kantak eman dio amaiera XIII. mintegi honi.

Mintegiko argazkiak

Gernikako GUGAZte! egitasmoak badu logotipoa

2010-03-22T17:13:00.006+01:00

Martxoaren 20an, larunbatean, AEK-k GUGAZte! egitasmoa aurkeztu zuen Gernikako Elai-Alai aretoan. Proiektu honen helburua 12 eta 24 urte bitarteko gazteak euskara modu naturalean erabiltzera bultzatzea da. Aldi berean, gazte etorkinek ere euskara erabiltzeko tresna izan nahi du, hauek ez dezaten euskara inposaturiko hizkuntza moduan hartu.

Egitasmo hau 2008an jarri zen martxan, Gernika-Lumoko Udalak eta Ahize-AEKk sinatutako akordioaren ondorioz. Helburu nagusia gazteak euskarara hurbiltzea izanik, gazte horiei zuzendutako jarduerak antolatzen hasi dira, euren artean egindako 500 inkestaren emaitzak aztertu ondoren.

Esate baterako, abian jarritako lehen jarduera egitasmoaren logotipo ofiziala izango dena aukeratzeko lehiaketa izan da, eta bi kategoriatan banatu da. 18 urtetik beherakoen artean, irabazlea Estephanie Romero izan da, Bolivian jaiotako 15 urteko gernikarra. Eta 18 urtetik gorakoen artean, 21 urteko Amaia Badiolak irabazi du lehiaketa. Biek jaso dute sari legez ordenagailu eramangarri bana. Ekitaldia, larunbatean egin genuen eta 80 lagun hurbildu ziren, besteak beste, sariketaz gain, RAPa, breakdancea, musika eta dantza saio paregabeaz gozatzeko.

esaera zaharren 17. txapelketa

2010-03-17T18:22:00.005+01:00

Esaera Zaharren Txapelketa arrakastatsuaren edizio hau apirilaren 17an izango da, igandearekin, eta ohi bezala, Sopelan. Esaera Zaharren Txapelketa urtero-urtero egiten den egun osoko ospakizuna da, atsotitzak, bertsoak eta jaia ezin hobeto uztartzen dituena.

Txapelketak bi saio ditu: eguerdian kanporaketak herrian zehar eta arratsaldean finalak Ander Deuna ikastolan. Taldeka egiten da (2-4 kide, 16 urtetik gorakoak) eta bertsolariek botatzen dituzten bertsoak aurretik banatzen den zerrendako 100 esaeretatik zeini dagokion asmatzean datza.

Izena emateko epea apirilaren 12an bukatuko da. Inskripzioa 12 eurokoa da eta bazkarirako txartela 18 eurokoa pertsonako. Izena emateko edo informazio gehiago

Kaixo maitia, praktikatu nahi?

2010-03-05T11:23:00.002+01:00

kaixomaitia.com kontaktu edo harremanak euskaraz bideratzeko web ordaindutako zerbitzua da. Bertan euskarazko harremanak izateko eta gainerako lagunekin mezuak trukatzeko aukera dago.

Facebook-eko praktikatu AEKren lagunek hiru hilabeteko harpidetza osoa doan izango dute apirilaren 30era arte Facebook-en Kaixo Maitia taldearen zale eginez gero. Beraz, badakizu, facebooken sartu, egin praktikatu AEKren laguna eta topatu kaixo maitian zure laranja erdia.

Kaixomaitia.com zer den ikusteko hemen duzu bideo bat.

mintzapraktika egiten baduzu AIZU! aldizkaria merkeago

2010-03-01T17:20:00.009+01:00

AIZU! oinarrizko euskaraz idatzitako aldizkaria da, euskara ikasten ari den edota euskaraz irakurtzeko ohiturarik ez duen ororen lagungarri. AEK-k argitaratu eta harpidetza bidez jaso daiteke norberaren etxean, irakurle ororentzako moduko aldizkaria baita.

AIZU! aldizkariak urtean hamar ale kaleratzen ditu (hileko bat, abuztuan eta urrian izan ezik), eta batez ere gizarte eta kultura gaiak lantzen ditu, erreportaje, elkarrizketa eta albiste laburren bidez. Komikiak, denbora-pasak eta euskal gramatikaren inguruan sortzen diren zalantzak argitzeko txokoa ere biltzen ditu bere orrietan. Testu guztiak daude euskara errazean idatzita eta hiztegi sarreratxoen laguntza dute, hitz eta egitura zailenak ulertu ahal izateko.

Mintzapraktika egitasmoetan (berbalagun, mintzalagun...) parte hartzen baduzu urteko harpidetza merkeago egingo dizugu. Bete datu haue k eta zurekin jarriko gara harremanetan.

hemen gaude, gaelikoren alde!

2010-02-15T14:07:00.003+01:00

Europako hizkuntz gutxituak indartzearen alde dauden lagunak gero eta gehiago gara, berri hau horren adibidea da. Martxoaren 9an, Irlandan, gure Korrikaren moduko bat antolatu da, Rith du izena eta bederatzi egunez gelditu gabe 1.600 km egingo du irlaren punta batetik bestera.

Aurreko mezuan Bretainako Redadeg lasterketari buruzko informazioa eman genizuen, eta ziurrenik datorren urtean beste baten berri izango dugu, izan ere, Galesen antzeko zerbait antolatu nahian daude eta.

Bretainako Korrika

2010-01-20T15:02:00.003+01:00

2010eko maiatzaren 10etik 15era Redadeg-ek, bretoieraren aldeko lasterketa, 6 egunez Bretaina zeharkatuko du, orotara 1.200 kilometro. Gure Korrikari begiratu zioten bertakoek eurena egiteko, gustatu eta egin. Ziur gaude bigarren edizio honetan ere arrakasta bermatuta dagoela. Redit Breizh!

ikaskuntza konbinatua, 3. maila

2010-01-14T18:20:00.002+01:00

Azken urteotan asko aldatzen ari da euskaltegietako ikasleriaren profila. Gero eta denbora gutxiago, gero eta ordutegi sakabanatuagoak. Erronka handia gertatzen ari zaigu euskaltegioi egoera berriarentzat egokiak izan daitezkeen erantzunak topatzea. Alde horretatik, aurrez aurreko saioak eta on-line uztartzen dituzten ikastaroek aukera zabala daukate, taldekako lana eta autoikaskuntza batzen dituelako. zaugarri horietaz guztiez baliatu nahi dela AEKren ikaskuntza konbinatua.

ON-line eta ON-do ikasi!

zabaldu urtea euskarari!

2009-12-31T11:27:00.003+01:00

AEK eta UPV-EHUren arteko hitzarmena

2009-12-18T14:05:00.003+01:00

AEKren mintzapraktika egitasmoetan (berbalagun, mintzalagun...) parte hartzen duten Euskal Herriko Unibertsitateko ikasleek aukera askeko kredituak eskuratu ahal izango dituzte. Adostutakoa honakoa da:

Unibertsitateko ikasleen zeregina: mintzapraktika egitasmoan dauden euskaldun berriekin astean ordu batez elkartzea eta euskara ikasleak ikas-prozesua amaitzen laguntzea. Egitasmo hauek mintzataldeetan antolatzen da, unibertsitateko ikasleak bertan integratuko lirateke eta laguntzaile papera beteko lukete. Orotara 45 ordu, hau da, 3 kreditu

Euskal Herriko Unibertsitateak parte hartzen duten ikasleei euren espediente akademikoko aukera askeko kredituak lortzeko aukera emango lizkieke..

AEKren Praktika Zerbitzua berriz, ikasle horien jarraipena eta ebaluazio txostena egiteaz arduratuko litzateke.

Izena eman edo informazio gehiago nahi izanez gero, bete fitxa hau eta zurekin jarriko gara harremanetan.

Egunkaria libre!

2009-12-10T17:51:00.001+01:00

euskara ikastea eta mendia

2009-11-30T13:17:00.002+01:00

Euskara ikastea eta mendia igotzea antzekoak dira. Bietan abian jartzeko hasierako motibazioa ezinbesteko da. Beharko dugun guztia zakuan sartuta, nagitsu batzuk, oso animatuta besteak, irteten gara etxetik. Inoiz egin ez baduzu maldan gora egitea lan nekeza izan daiteke, baina lehen muinoak igarota maiztasunez praktikatzeak duen garrantziaz konturatzen gara.Horrelakoetan sherpa euskaldunak gure ondoan bidelagun izatea inportantea da, haiek ondo entrenatuta daude eta euren aurrera! eta aupa! guztiei esker aise ibiliko gara euskararen tontorrera heldu arte.

Antzekoak direlako beharbada sortzen dira mintzapraktika egitasmoetan horrenbeste txango eta mendi-talde. Bilbo, Iruñea, Getxo, Baiona… eta orain ere Ezkerraldean mendilaguna sortu dute. Animatuko zara zeu ere euskararen gailurrera igotzen?

irakurle kanpaina, 2009ko negua

2009-11-18T09:56:00.002+01:00

Irakurle kanpainaren helburua, AEKideei liburuak eta diskak eskuratzeko baldintza hobeak eskaintzeaz gain, euskara ikasleen artean euskal literatura eta musikaren kontsumoa sustatzea da.

Hemen daukazu 2009ko neguko katalogoa

BERRIA % 50 merkeago mintzapraktikako partaideentzat

2009-11-16T10:55:00.006+01:00

Mintzapraktika egitasmoetako partaidea bazara (mintzalaguna, berbalaguna, mintzakidea…) AEK-k BERRIArekin duen akordioari esker, asteburuetan zure kioskoan %50 merkeago jaso dezakezu egunkaria.

Horretarako zure datuak hemen bete eta kioskoaren izena eta helbidea idatzi. Datuok konprobatzeko jarri zein egitasmotan parte hartzen duzun.

azaroaren 16an hasiko da mintzapraktika egitasmoen inguruko inkesta

2009-11-11T13:24:00.003+01:00

Hizkuntza Politikarako Sailburuordetzak, AEK-rekin eta Topagunearekin batera, mintzapraktika egitasmoen eraginkortasuna neurtzeko inkesta jarri du abian. Ikerketaren helburua esperientzia hau zabaldu eta hobetzeko informazio baliagarria eskuratzea da. Ikerketa egitea AZTIKER ikerguneari egokitu zaio. Orain arte, zenbait aditurekin elkarrizketak izan dituzte gaiari lehen hurbilpena egiteko, eta eztabaida talde bana egin dute honen inguruan, Arrasaten, Atarrabian eta Santurtzin.

Azaroaren 16tik aurrera, mintzapraktika programatan ari diren lagun guztiei inkesta egingo zaie, gure eskaintza hobetzeko eta zabaltzeko, ezinbestekoa iruditzen baitzaigu partaideen iritziak eta balorazioa ezagutzea. Galdesorta betetzen duten guztiek zozketa batean parte hartuko dute, zozketan irabazle suertatuz gero, talde osoa eta egitasmoko dinamizatzailea ere izango dira sarituak. Aukeran izango dute afaria edo aste bukaerako egonaldia. Zorte on!

Bilboko berbalagunak praktikatzen hasi dira

2009-11-06T14:52:00.006+01:00

Atzo, azaroaren 5ean, Bilboko berbalagun egitasmoaren hasiera ekitaldia izan zen. Horretarako, egitasmoaren berri eman eta, jai bati dagokion bezala, “txupina” botatzeko, bi saio antolatu ziren, goizean bata eta arratsaldean bestea: Goizeko saioa batez ere informatiboa izan zen, berbalagun proiektua zer den eta nola parte hartu azaltzeko. Arratsaldekoa gehiago izan zen jaia, hasiera jaia hain zuzen ere, Alde Zaharrean dagoen Kalderapeko kulturgunean ospatu zen.

2009/10 ikasturtean AEK-k mintzapraktika egitasmo asko martxan jarri ditu beste herri askotan, besteak beste; Sestao, Zarautz, Altsasu, Lekeitio, Santurtzi, Durango, Bilbo, Gernika, Artziniega, Orio, Sopuerta, Galdakao, Etxarri, Astigarraga, Hernani,Donostia, Ortuella, Urduña, Bermeo, Abadiño, Abanto-Zierbena, Muskiz, Balmaseda, Getaria, Zalla, Andoain, Gordexola, Aiara, Amurrio, Laudio Orozko, Berriz, Ermua, Markina-Xemein, Ondarroa, Urduña, Zumaia… eta Seguran ere azaroan martxan hasi da.

Informazioa AEKren euskaltegietan aurkituko duzu edo e-posta honetan

AEK-k praktika egitasmoak sustatzeko material didaktikoa sortu du

2009-10-27T19:40:00.004+01:00

AEKren zeregina euskaraz mintzatzen, irakurtzen eta idazten irakatsi eta euskal kulturan sakontzeko aukera eskaintzea da. Horregatik, AEKren eskaintza ez da mugatzen dituen euskaltegietara. Izan ere, hizkuntzaren gainean AEK-k duen ikuspegia hoberen adierazten duen hitza erabilera da, komunikazioa. Beraz, AEKren helburua ikasleek euskaraz komunikatzeko gaitasuna lortzea da, eta ikasleek, ikasteaz gain, euskara erabiltzea, alegia, praktikatzea. Horretarako ikasleei euren ingurunean euskara praktikatzeko aukera anitzak eta erakargarriak eskaintzen ditu. Eskaintza hauen berri praktikatun dago.

Ikasleei web gune hau ezagutzera emateko asmoz, 1B, 2. eta 3. mailetako ikasleei zuzenduta dauden atazak sortu ditu AEK-k, blogari buruzko informazioa eskaintzeaz gain, bertan iragartzen diren ekimenetan parte hartzera bultzatzeko. Aipatu atazek euskara eskoletarako tresna diren heinean, ikas-prozesuari erreparatuta, maila bakoitzerako ikasleei dagokien eduki bat edo batzuen lanketa bideratzeko proposamena eskaintzen dute.

Atazak deskargatzeko ondoko loturetan klikatu

eskuko behatzak ere ez dira igualak

2009-10-14T12:50:00.005+02:00

AEK-k, euskaltegietako ikasturtea hastearekin batera, mintzapraktika programetarako kanpaina berria jarri du abian eskuko behatzak ere ez dira igualak lemapean. Honenbestez, 09-10 ikasturtean mintzapraktika programa batean parte hartu nahi duten guztiek eman dezakete izena jada Euskal Herrian diren 50etik gorako egitasmoren batean.

Mintzapraktika programetan edozeinek har dezake parte, berdin dio euskaldun zaharra, euskaltegiko ikasle ohia edo euskaltegiko ikaslea bada. Berdin dio zein den bere jatorria, adina, lanbidea edo zeintzuk bere zaletasunak, azken batean, eskuko behatzak ere ez direlako igualak. Egitasmoen inguruko informazioa: http://praktikatu.blogspot.com/

Parte hartzeko datu hauek baino ez dira bete behar. Zure herria edo auzoa ez baduzu bertan topatzen jarri harremanetan gurekin eta dituzun aukerak azalduko dizkizugu.

AEK, euskara ikasteko biderik laburrena

2009-09-07T16:29:00.001+02:00

Ndjomba, berbalagun senegaldarra

2009-06-22T10:15:00.006+02:00

Senegaldik Lekeitiora heldu zen Ndjomba Ndong, euskara praktikatzeko berbalagun egitasmoan sartu eta azken 2 urteotan Markina-Xemeingo berbatalde batean dabil. Beste lagun batzuekin batera 2009ko mintzaegunean omendu dute.

Bideoan berarekin batera Lea Artibaiko berbalaguneko dinamitzailea Bego Llorentek egitasmoaren nondik norakoak azaltzen dizkigu.

Elkarrizketa Berria TB-k grabatua.

praktikatuko dinamizatzaileak

2009-06-12T14:51:00.003+02:00

Argazkian dituzun lagun hauek AEKren praktika jardueretako dinamizatzaileak dira, 2008/09 ikasturtean 27 lagun ibili dira AEKn horrelako egitasmoetan.

Pasa den astean koordinazio bilgunea izan genuen eta bertan ikasturte honetako balantzeak, datorren ikasturteko plangintzak, zerbitzuaren erronkak eta egitasmo berriak izan genituen mintzagai.

Formazio plana ere aurkeztu genuen eta horrekin lotura zuzena duen dinamizatzaileon interneteko gunea. Bertan materiala eta lan egiteko tresnak eskuragai izateaz gain, eztabaidarako aukerak ematen dituen plataforma digitala dugu berau.

Datorren ikasturtean lagun gehiago izango gara, baina une honetan argazkian daudenak aurkeztuko dizkizugu, beraiek gabe horrelako programak aurrera eramatea ezinzekoa litzateke eta.

Ezkerretik eskuinera eta behetik gora: Estibaliz Irabien, Ana Castro, Aitzol Gaztañazatorre, Iker Sagastibeltza, Arantzazu Guarrotxena, Ziortza Aldekoa-Otalora, Juanmi Bravo, Xabi Garmendia, Miren Iturriagaetxebarria, Joana Victoria, Luix Intxauspe, Bego Lorente, Orats Arana, Iratxe Dañobeitia, Txomin L. Aramaio, Ione Ugarte, Saioa Bacigalupe eta Usoa Cuende.

Argazki honetan ez dira agertzen: Iratxe Murias, Igone Saiz, Ana Kristi Gutierrez, Aintzane torre, Aitor Agote, Pili Ibarra, Nerea Yabar eta Edorta Lopez.

mintzapraktika egitasmoak sustatzeko lankidetza hitzarmena

2009-06-08T14:30:00.000+02:00

Mintzapraktika egitasmoak zabaldu, sendotu eta garatzeko lankidetza hitzarmena sinatu dute Topaguneak eta AEK-k. Azken urteetan erakunde biek izandako harreman eta elkarlana hitzarmenean gauzatu dute horrela bi erakundeek. Jasone Mendizabal zuzendariak, Topagunearen izenean, eta Mertxe Mugika koordinatzaileak, AEKren izenean, sinatu dute hitzarmena Euskaltzaindiak Bilboko Plaza Berrian duen egoitzan.

Mintzapraktika egitasmoek azken urteotan izan duten hazkundea azpimarratu dute ordezkari biek eta elkarlanak hazkunde horretan izandako eragina handia izan dela gogoratu. Izan ere, gaur egun 2.600 lagunetik gora ari baitira ia 50 herri eta eskualdetan martxan dauden egitasmoetan parte hartzen. Euskararen erabileran eragiteko eta hiztunen hizkuntzarekiko atxikimendua lantzeko funtsezko egitasmoak bihurtu direla esan dute Mendizabal eta Mugikak.

Hitzarmenaren bidez erakunde biek hartzen dute herriz herri martxan jartzen diren egitasmoetan tokian tokiko euskara elkarte eta euskaltegien arteko harremana bideratu eta elkarlana bultzatzeko konpromisoa. Era berean, egitasmoetan lanean ari diren dinamizatzaileentzako prestakuntza saioak antolatu eta egitasmoak gizarteratzeko erakunde bien arteko harremana areagotzea da hitzarmenaren helburu.

irakurle kanpaina 2009

2009-05-27T18:55:00.010+02:00

Irakurle kanpaina AEKn ikasturtean bitan (neguan eta udan), egiten dugun eskaintza da. Irakurle Kanpainaren bidez euskal liburu eta diskak merkeago eskuratzeko aukera eskaintzen die AEK-k bere ikasle, irakasle eta AEKide guztiei.

Irakurle kanpainaren helburua, AEKideei liburuak eta diskak eskuratzeko baldintza hobeak eskaintzeaz gain, euskara ikasleen artean euskal literatura eta musikaren kontsumoa sustatzea da.

Hemen daukazu 2009ko udako katalogoa

UEUko ikastaroak, praktikatu eta jantzi!

2009-05-20T11:15:00.008+02:00

Aurten Udako Euskal Unibertsitateak 38 ikastaro ezberdin eskainiko ditu Eibar, Baiona eta Iruñeko egoitzetan. Euskara praktikatzeko aukera paregabea da hau, izan ere ikasleen eta irakasleen artean herrialde guztietako jendea elkartzen da, horietako batzuk euskaldun zaharrak besteak berri-berriak. Gainera euskarazko klaseak jarraitzea ez da hain zaila, terminologia akademikoa nahiko antzerakoa da hizkuntza guztietan.

Aurten gainera euskararen praktikantea bazara, hau da berbalagun edo mintzalagun egitasmoetako partaidea bazara, matrikulan %50eko deskontua izango duzu.

Deskontua izateko zer egin behar da? Oso erraza, matrikula egin aurretik bidali guri mezu bat esanez nongo egitasmoan zabiltzan eta guk baieztatu ostean matrikula egin. Mezua helbide honetara bidali: praktikatu@aek.org zure izen-abizenak eta parte hartzen duzun herriaren izena aipatuz.

Ikastaroen inguruko informazioa hemen

mintza eguna 2009

2009-05-12T13:32:00.006+02:00

Asko dira herriz-herri, Euskal Herri osoan zehar astero biltzen garen lagunak, euskaraz hitz egin eta harreman sare berriak sortzeko asmoz. Urte osoan zehar euren herri edo eskualdeko lagunekin duten harremanetik harantzago, urtean behin bilkura handi bat egitea ere antolatzen dute, komunitate handi baten partaide direla erakutsi, beste herrietako lagunekin harreman berriak egin eta mintzapraktika egitasmoetan parte hartzen ez dutenak animatzeko.

Ekainaren 6an, Gasteizera hurbilduko diren lagunek elkar ezagutzeko parada izango dute.

atsotitzak lehian

2009-04-30T17:16:00.004+02:00

Iaz hildako Gotzon Garate zena gogoan izango du aurten Sopelako XVI. Esaera Zaharren Txapelketak. Izan ere, besteak beste Garatek atsotitzak biltzen egindako lan eskerga arrunt lagungarria izango zaie antolatzaileei, zalantzarik gabe.

Sopelako Nikola AEK euskaltegiak antolatzen duen txapelketak Jakinek ez deko kalterik leloa du oinarri aurten, eta esaerari jarraikiz, parte-hartzaileen jakintza proban jarriko dute egun osoan zehar burutuko den txapelketan. Maiatzaren 16an egingo da, eta ohi bezala, taldeka jokatuko da, bi bertsolariren laguntzarekin. Aurtengoan, Jone Uria eta Aitor Mendiluze bertsolariak gonbidatu dituzte.

Izena emateko epea maiatzaren 11n amaituko da, eta informazio gehiago nahi duenak, Nikola AEK euskaltegira jo dezake: 94.421.23.29 e-posta aitor-f@aek.org. Azkar ibili, sari mundialak banatuko dituzte-eta!

Hitzaditza, diktaketa euskaraz

2009-04-20T10:58:00.004+02:00

Aurten ere Euskal Kultur Erakundeak eta AEK-k Hitzaditza, euskarazko diktaketaren laugarren edizioa antolatu dute Baionan.

2008an, 80 bat pertsonek ariketan parte hartu zuten. Beti bezala bi taldetan banatuko dira: euskara ikasleak eta euskaldunak. Aurten ere 13-16 urte arteko gaztetxoen maila proposatua izanen da.

Ariketa euskarazko momentu goxo bat iragaiteko aitzakia da: Bertan, Iparraldeko idazleekin mintzatu eta euskarazko liburuen eskaintza ezagutzeaz gain, sariak irabazteko aukera dago, euskal kultura eta aisialdiarekin lotura zuzena dutenak.

Izen-emateko epea: maiatzaren 7
Informazio gehiago hemen

familia barnetegia

2009-04-06T14:32:00.006+02:00

Urtero bezala AEK-k prest ditu aurtengo udan irekita egongo diren barnetegiak, horien artean aurten ere familiek parada ederra izango dute oporrak elkarrekin eta euskaraz pasatzeko. Oso ohikoa da euskaraz ez dakiten edo ikasten ari diren gurasoek umeak D ereduko eskoletara bidaltzea, txikitatik ikas dezaten euskara. Baina kasu batzuetan, ohituren poderioz, nahikoa zaila izaten da etxeko eguneroko harremanak euskaraz izatea.

Hori da, hain zuzen ere, familientzako barnetegien helburua: gurasoek eta seme-alabek beraien artean euskaraz hitz egiteko ohitura hartzea. Xede hori lortzeko aita-amek irakasleekin eta seme-alabek begiraleekin igarotzen dituzte eguneko zenbait ordu, baina behin horiek amaituta, barnetegi giroan eta euskaraz jarraitzen dute egun osoan zehar. Era honetako barnetegiak antolatuko ditu AEK-k aurtengo udan, Adunan (Gipuzkoa) Foruan (Bizkaia) eta Zugarramurdin (Nafarroa), uztailaren 6tik 19ra eta abuztuaren 3tik 16ra.

Ikastaro hauei guztiei buruzko informazio gehiago nahi izanez gero, galdetu zure euskaltegian edo deitu 902 362 294 telefonora. Ongi etorri barnetegira, ongi etorri euskarara!

ongi etorri

2009-04-02T13:27:00.003+02:00

AEKn lan egin nahi duzu?

2009-03-06T13:39:00.004+01:00

Ikasturte honetan AEKn 422 lagun ari gara lanean; gehienak irakasleak bagara ere, badaude bestelako lanpostuak; praktika egitasmoetako dinamizatzaileak, normalkuntzako teknikariak, euskaltegietako zuzendariak, didaktikariak, administrariak...

Une honetan irakasle beharra dugu. Gurekin aritzeko prest bazaude, bete fitxa hau eta zurekin jarriko gara harremanetan.

Zer eskatzen dugu?

Euskaltzaletasuna.
Lanerako gogoa.
Erdi mailako titulazioa.
EGA edo baliokidea.
Arloaren araberako oinarrizko formazioa edota formazio hori jasotzeko gogoa eta disponibilitatea.

Zer eskaintzen dugu?

Norberaren disponibilitatearen araberako lan ordutegiak.
Lanaren arabera, jardun osoz edo partzialez aritzeko aukera. Egun osoko jardunaren kasuan, 20.000 €-tik gorako urteko soldata gordina.
Lan giro atsegina.
Euskal Herri osoan ari den erakunde baten partaide izatea.
Beharren araberako punta-puntako barne formazio ekimenetan parte hartzeko aukera.

liburuak ere mendizale

2009-02-18T16:42:00.003+01:00

Hogeigarren urteurrenaren harira, Lizardiko Mintza Taldeak ospakizun eta ekitaldi uzta oparoa du urte osoan; tartean liburu ibiltaria ekimena. Denbora eta espazio mugarik gabeko liburutegi bihurtu asmo dituzte Euskal Herriko mendiak. Hogei mendi tontorretan hogei euskal idazleren beste hainbeste liburu utziko dituzte, eta haietako bat topatzen duen mendizaleari jarri diote egitekoa: irakur eta goza dezala aurrena, eta gozamen hori partekatu dezala, liburua beste mendi baten puntan utzita.

Azken batean, bookcrossing-a, azken urteetan mundu osoan indar hartzen ari den ekimena, mendira eramateko saioa da; liburuen trukea bultzatzeko saioa. Beraz, badakizu, mendiko tontor batean liburu bat topatzen baduzu, irakurri, gozatu eta konpartitu beste mendizale euskaldun batekin.argazkia: taldekideak Pirineoko Baregesen

bidaia intimoak, ongi etorri korrika!

2009-02-04T16:41:00.006+01:00

Korrika honetako omenaldia ez da ohi bezala kultur ikuskizuna izango, Korrika 16ren omenduak protagonistatzat dituen dokumental baten estreinaldia baizik.

Protagonistak euskaraz bizi nahi dugunon herrira etorritako lau pertsona dira, Korrika 16ren omenaldi beroa merezi duten milaka eta milaka lagunen ordezkari gisa hartutakoak. Mixele, Rami, Jesus Mari eta Tereixa. Lau pertsona ezezagun, aktore izan barik eta zinemaren munduarekin inolako loturarik eduki gabe, prest agertu dira Korrika 16ri ekarpen eder hau egiteko.

Hamaika dira euren modura euskarara hurbildu direnak eta euskaldun asko eta asko lau pertsona hauen bizitzetan identifikatuta sentituko dira, beraiek euskaraz bizi nahi dugunon herrira egindako ibilbidea milaka lagunek egin dutenaren antzekoa izango baita ziur aski. Jon Maiak zuzendutako eta Orio Produkzioak ekoiztetxeak Korrika 16rentzat egindako dokumentala, otsailaren 7, 19:00etan estreinatuko da Bilboko Euskalduna Jauregian.

asteburuko barnetegiak

2009-01-27T09:53:00.005+01:00

Asko dira ikasturtean ikasleekin batera asteburuko barnetegia antolatzen duten euskaltegiak. Ostiraletik igandera, herri euskaldun batean, eskolak eman, txangoak eta jarduerak antolatu, bertako euskaldunekin harremanetan jarri, euskaltegia bera dinamizatu...

Hemendik zoriondu eta animatu nahi ditugu lan horretan aritzen diren euskaltegiak eta bertako irakasleak; egiten duten lana ederra baita. Alde batetik; neguko zein udako barnetegietara hurbiltzeko ariketa interesgarria delako eta beste aldetik, ikasleei euskaltegian duten prozesuaz gain, beste aukera paregabe bat ematen zaielako euskaraz treba daitezen.

Donostian, iriki atia!

2008-12-05T12:57:00.005+01:00

Euskararen erabilera eta euskararen ikaskuntza bera sustatzeko iriki atia egitasmo berria abiatuko da Donostian datorren astean, donostiar euskaldunak euskara ikasleekin elkartu nahi dituena, besteak beste.

Horretarako, Donostiako AEK-k doan izango diren hainbat ikastaro, tailer eta saio monografiko antolatuko ditu 08/09 ikasturtean egiteko. Ikastaroek iraupen malgua izango dute, beraien ezaugarrien baitan: egun bakarrekoak, bi, hiru egunekoak edo aste osokoak. Ikastaro bakoitzean 15-20 lagunek hartuko dute parte. Batez beste, partehartzaileen bi heren euskara ikasleak izango dira, eta beste herena hiriko euskaldunak.

iriki atia egitasmoaren ikurra edo logoa Portaleta da. Portaleta, Donostiako harresiaren parte da, itsasorako pasabidea, hain zuzen. Aterik gabeko pasabidea da Portaleta. AEK-k ikurtzat hartu du, eta bere bitartez euskaltegiaren eta kalearen arteko aterik gabeko pasabidea irudikatzeko: euskara ikasleok eta donostiar euskaldunok harremanetan jarriko dituen topalekua.

Informazio gehiago: http://irikiatia.blogspot.com/

iriki atia Donostiako AEK-k kudeatu eta Udalaren Euskara Patronatuak babesten du.

Facebook-en ere euskara praktikatu

2008-11-06T18:39:00.011+01:00

Urriaren hasieran, ikasturte berriarekin batera, lagun batzuk elkartu ziren interneten bidez praktikatzeko gune bat sortu nahian. Dagoeneko Facebook-en praktikatu gurekin izeneko taldean 100 lagunetik gora sartuta daude eta sarean euskarazko harreman berriak garatzen dabiltza. Edozeinek har parte dezake, bertan kontua baino ez da egin behar.

Facebook-en kontua sortzeko klikatu hemen

argazkia: meatzaldeko berbalagunak

2008ko barnetegi ibiltaria

2008-10-08T18:44:00.007+02:00

Joan den udan, ohi bezala abuztuaren lehenengo hamabostaldian, bazter guztietako hainbat euskara ikasle eta AEK-ko hiru irakasle bildu eta, bizikletaz, Euskal Herria batetik bestera zeharkatu dugu giro ederrean. AEK-k antolatzen duen barnetegi ibiltariaren 8. edizioa izan da aurtengoa, eta orotara 20 lagunek hartu dugu parte bertan.

Abuztuaren 2an, tropelean, Urduñatik abiatu ginen eta, Gorbeia aldea, Urbasa, Irati, Leitzaran, Aldude, Baztan, Aralar eta beste hainbat paraje ederrez gozatu ondoren, Zarautzera iritsi ginen 16an 1.000 kilometro inguru ibili ondoren. Eta hori dena, jakina, euskaraz, euskaltegian ikasitakoa lagun berriekin praktikan jartzen eta, zergatik ez, batzuek besteengatik gauza berriak ikasten, betiko eskolak ez baitira geure hizkuntzan aurrera egiteko bide bakarrak.

Esperientzia, urtero bezala, benetan ederra izan da, eta jakin badakigu hainbat ikaslek 9. ediziora sasoian iristeko entrenamenduekin hasiak direla. Baina, aurreko urteko errepikatzaileez gain, ikasle berriak beharko ditugu taldea osatzeko. Izango zaitugu zeu ere datorren urteko tropelean?

argazkiak: hemen

2008/09 ikasturteko kanpaina

2008-09-24T19:23:00.001+02:00

formularioa

2008-09-24T09:19:00.015+02:00

Datu Pertsonalak Babesteari buruzko abenduaren 13ko 15/1999 Lege Organikoan xedatzen dena betetzearren, jakinarazten dizugu zure datu pertsonalak PRAKTIKA JARDUERAK fitxategian sartuta daudela eta horren helburua dela praktika zerbitzuan izena ematen duten pertsonen kudeaketa. Datu horiek administrazio publikoei laga ahal izango zaizkie, goian zehaztutako helburuak betetzeko xedez. Fitxategia Datuak Babesteko Agentzian aitortu dugu eta datuen segurtasuna bermatzeko neurriak ezarri ditugu.

Fitxategi horien erantzulea EUSKARAZ KOOP. ELKARTEA (AEK) bera da eta, horri dagokionez, hala nahi izanez gero, aipatutako Legean aurreikusitako sarbide, zuzenketa, ezeztapen eta aurkaritza eskubideak balia ditzakezu; horretarako Txakur Kalea 1, 4.a 48.500 Bilbo helbidera edo lopd@aek.org posta elektronikora eskaera bat bidali behar duzu, NA edo nortasuna egiaztatzeko beste agiri batekin batera.

"Bazala eta Badala" teoria + praktika

2008-09-23T15:58:00.003+02:00

Eibarko AEK-k antolatu duen “Bazala eta Badala” egitasmoarekin euskaltegiko ikasleek nahiago dituzten gaiak aukeratu ahal izango dituzte; irakasleek nahi eta gustu horien araberako programazioa landuko dute eta, bide batez, gai horietan aditu diren Eibarko euskaldunekin harremanetan jarriko dira.

Egitasmoaren helburua euskaltegiko jarduera ikasleen zaletasunetara egokitzeaz gain klasean ikasitakoa klasetik kanpo modu errealagoan praktikan jartzea da, euskaltegiko ikasleak aukeratu gaiekin lotura duten hainbat herrikide euskaldunekin harremanetan jarriz.

Informazioa:

Eibarko aek euskaltegia
943 201 379