2012/11/20

Azaroko kronika

-->


Ikasturtea hastearekin batera martxan jarri ziren Euskal Herri osoko mintzapraktika programetako taldeak, lehenagotik bazebiltzanak baita sortu berriak ere. Behin martxa hartuta, aurkezpenak edota hasiera jaiak izan dira herriz herri. Aurreko zenbakian, urrian zehar ospatutakoak aipatu genizkizuen eta azarorako iragarritakoak ospatu dira dagoeneko:


Azaroaren 8an, Aiaraldeko berbalagunen aurkezpena izan zen Luiaondon, baita Urola Kostako mintzalagunen hasiera ekitaldia Zarautzen. Hemen “Ni ta punto” ipuin saioarekin gozatu egin zuten.
Azaroaren 9an, Ezkerraldeko berbalagunen jaia izan zen Portugaleten; Pantxika Lamurren ikuskizuna izan zen Snata Klaran eta ondoren pintxo-poteoa egin zuten alde zaharretik.
Hurrengo egunean, Azkoitiarren txanda izan zen, Larunbata izanik goizeko 10:00etan elkartu ziren Kontzejupean eta egitasmoa aurkeztu ondotik, Ruben Sudupe biologoarekin ibilaldia egin zuten Ubaiar auzora, eta amaitzeko mokadutxoa.
Leioako aurkezpena izan zen hurrengoa, azaroaren 14an jarri zuten zita kiroldegiko aretoan, espero baino jende gehiago hurbildu zen eta aretoa topera bete zen. Aurreko ikasturtean zehar berbalagun eta gurasolagunek egindako ekintzei buruzko bideoa izan zen ikusgai, beteranoenek beren esperientzia azaldu zuten eta askaria izan zen hemen ere.
Bilboko egitasmoaren aurkezpena, Kalderapeko kulturgunean izan zen azaroaren 15ean, bertako dinamizatzaileek egitasmoa aurkeztu zuten, berbalagun historikoen testigantzak izan ziren eta bukatzeko Bertso poteoa egin zuten Inazio Vidal eta Peio Ormazabal bertsolariekin alde zaharreko tabernetatik.

Aurkezpenez gain, beste hainbat ekintza egin dituzte berbelagun, mintzalagun eta mintzakideek hilabetean zehar, besteak beste: Leioan kantu poteoa, Bermeon gabonetako apaingarriak egiteko tailerra, Hego Uribekoek Bilboko Itsas Museora bisita, Meatazaldeko gurasolagunek Zugaztietara irteera Andoaingo Mintzalagunek Leitzaranera eta Gernikako berbalagunek hileroko mendi irteera.

Abenduan ere, ezin konta ahala ekintza berri izango dira mintzapraktika egitasmoetatik bideratuko direnak. Guzti horien berri praktikatu.org webgunean izango duzue eguneratuta. Eta gogogaratu izena emateko aukera duzula webgunean bertan edota zure herriko euskaltegian, praktikatu gurekin!

No comments: