Bertsolaritza barnetegia

Euskara lantzeko beste modu baten bila zabiltza? Bertsolaritza barnetegia da zure aukera. Euskara praktikatzeko era ezin hobea da bertsoaz gozatzea, ez bakarrik ulertzea, baizik eta gozatzea. Abuztuaren 1etik 7ra izango da Foruan (Bizkaia), Bertsozale Elkartearekin eta Iruñeko Oinak Buruan bertso eskolarekin elkarlanean antolatu dugun barnetegia.

Ez kezkatu bertsolaritzaz ezagutza handirik ez badaukazu ere, euskaldunberrientzako eta euskara ikasten ari zaretenontzako zuzenduta dago eta bertsolaritza hutsetik hasita landuko dugu: bertsolaritzari lotutako kultur erreferentziak eta terminologia ezagutzea, tradizioa ezagutzea (bertso zaharrak, doinuak, bertsolariak...), bertsolariek inprobisatzerakoan erabiltzen duten teknika zein den ezagutzea eta pittin bat esperimentatzea izango dira langai nagusiak.

Goizetan gela barruko lanketak egingo dira. Hitzarekin jolastu eta sormena landuko da. 

Arratsaldetan eta gaubelan, harremanak sustatzeko ekintzak egingo dira, beti ere bertsoa eta bertsogintza baliatuta. Aisialdiari lotuagoko dinamika eramango da arratsalde-gauean. 

Honetaz gain, aipatzekoa da bertso afaria izango dela Maialen Lujanbio eta Unai Iturriaga bertsolariekin eta kantagintza landuko dela, Oskar Estangarekin; barnetegian sortutako kantuekin diska osatuz.

Eta guzti hau soilik 295€-ren truke, ez esan merkea ez denik!
Izena emateko edo informazio gehiagorako, deitu 902 362 294 telefonora edo idatzi praktikatu@aek.org helbidera.